தமிழ் எங்கள் உயர்வுக்கு வான் - இன்பத்
தமிழ் எங்கள் அசதிக்கு சுடர் தந்த தேன்!
--பாவேந்தர்
வீறுடைய செம்மொழி தமிழ்மொழி!
உலகம் வேரூன்றிய நாள் முதல் உயிர்மொழி!
--பெருஞ்சித்திரனார்.
போட்டிகளும் விருதுகளும்
சீர்மிகு சித்திரை
'இருந்தமிழே உன்னால் இருந்தேன் – இமையோர் விருந்தமிழ்தம் என்றாலும் வேண்டேன்…' (தமிழ்விடு தூது)
-என்று புலவர்முதல் புன்சிறார்வரை ஒவ்வொரு தமிழரும் வியந்து நயந்து போற்றும் அன்னைத் தமிழைக் கொண்டாடும் அழகிய திங்கள் சித்திரை. ‘பொருப்பிலே பிறந்து தென்னன் புகழிலே வளர்ந்து சங்கத்து இருப்பிலே இருந்து...’ கல்வெட்டு முதல் கணினிச் சில்வெட்டுவரை இளமை குன்றாது கோலோச்சும் கன்னித்தமிழின் புத்தாண்டைக் கொண்டாடி, தமிழ்த்திறன்களில் தழைத்தோங்கி விளங்கும் சிறந்த வெற்றியாளர்களுக்குச் ’செந்தமிழ்ச் செல்வர்’ விருதுகள் வழங்கப்படும். கவிதை, பேச்சு, ஓவியம் என்று முப்பெரும் பிரிவுகளில் முத்தமிழின் முத்தான புதல்வர்களுக்கு இவ்விருதுகள் வழங்கப்படுகின்றன.
அகமகிழ் ஆனி
'இளமையில் கல்’ என்றார் இன்றமிழ் மூதாட்டி, பசுமரத்து ஆணி போல’ என்பது பழுதில்லாப் பழமொழி'
சிறுவத்திலேயே செந்தமிழின் சுவையுணர்த்தி, விதையாய் உறங்கும் மொழித்திறன்களையும் கவின்கலைத் திறன்களையும் விருட்சமாக்க வாய்ப்பென்னும் நீருற்றி வளர்க்கிறது வாகை சங்கம். ஆனித் திங்களில் அன்பிற்குரிய மழலைகளுக்குத் தமிழ்ப் பேச்சு, ஓவியம் முதலிய போட்டிகளை நடத்தி ‘மழலைமொழி மதியரசன்’ / ‘மழலைமொழி மதியரசி’ என்ற விருதுகள் வழங்கப்படுகின்றன.
அருந்தமிழ் ஆடி
'மாந்தர்தம் உள்ளத்தனைய உயர்வு'
-என்ற பொதுமறை போதனைக்கேற்ப நமது திறமைகள் நாம் கொள்ளும் ஊக்கத்தின் அளவே ஆகும். ஒவ்வொருவருக்குள்ளும் பல திறமைகள் உறங்கிக்கொண்டிருக்கின்றன, வாயுமைந்தனுக்கு வலிமையுணர்த்திய சாம்பவானைப் போல நம் திறமைகளை அடையாளங்காட்டி ஊக்கப்படுத்திக் களமமைத்துக்கொடுத்து வழிநடத்தி ஏற்படுத்தி வெற்றி வாகை சூட்டி மகிழ்கிறது தமிழ்ச்சங்க வாகை! ஆடித்திங்களில் அருந்தமிழ்ப் போட்டிகள் வைத்து வெற்றி பெறுவோருக்குக் ‘கவின்றமிழ்' விருதுகள் வழங்கப்படுகின்றன.
ஆண்டுவிழா ஆவணி
'தோகை விரித்தாடும் தொல்தமிழாம் மாமயிலின் மோகச் சிறகுகளில் முத்தான ஓரிறகாம் வாகை தமிழ்ச்சங்கம் வந்துதித்த பொன்னாளாம் ஆகத்துத் திங்களென்று ஆர்! [இன்னிசை வெண்பா]* '
வாகை தமிழ்ச்சங்கத்தின் ஆண்டுவிழா கொண்டாட்டங்களின் முக்கிய அங்கமாக ‘வாகை விருதுகள்’ வழங்கப்படுகின்றன. பல்வேறு மொழித்திறன் பிரிவுகளில் போட்டிகள் நடத்தப்பட்டு வெற்றி பெறும் தமிழன்னையின் தவப்புதல்வர்களுக்கு இவ்விருதுகள் ஆண்டுதோறும் வழங்கிச் சிறப்பிக்கப்படுகின்றன.
புதுமைப் புரட்டாசி
’அடியார்கள் வாழ அவுணரினந் தேய’* கொலுவிருந்து நோற்றாள் பராசக்தி அன்னை அன்று, ’இனமானம் வாழ, இழிதகைமை தேய’* கொலுவிருக்கிறாள் தமிழன்னை இன்று! ‘நவதமிழ் நவராத்திரி’: ஒன்பது இரவுகள், ஒன்பது தமிழ்வகை, ஒரே உணர்வு - தாய்மொழி!
அன்னைத் தமிழை அலங்கார கொலுவிருத்தி எண்ணத்தில் எழில்கூட்டி ஏற்றந்தரும் செயல்புரிந்து ஒன்பது நாளும் ஒவ்வொரு தமிழ்வகையை நண்ணும் அறிஞர் நாவுரைக்க உளங்குவித்துக் கேட்டும் பார்த்தும் கேளிக்கை போட்டியென நாட்டும் நவவிழா - நவதமிழ் நவராத்திரி!*
அப்துல் கலாம் ஐப்பசி
’உறக்கத்தில் காண்பதல்ல கனவு, உன்னை உறங்கவிடாமல் இயக்குவதே கனவு’ என்று உயர்ந்த கனவுகளை நம் உள்ளத்தில் விதைத்து, அக்கினிச் சிறகுகளால் விசிறிவிட்ட ஆசான், தேசத்தின் தென்கோடி மூளையிலே பிறந்து தேயாது உழைத்து ஏவுகணை ஏணியேறி பில்லியன் உள்ளங்களைப் பேதமின்றிப் பிணைத்த நல்லியல்பு நாயகன்...*
ஐயா அப்துல் கலாம் அவதரித்த (அக்டோபர் 15ஆம்) நாளைக் கொண்டாடும் வகையில் ஐப்பசியில் அவர்பேரால் ஆசிரியர்க்கும் மாணவர்க்கும் ‘கலாம் கனவு ஆசிரியர் விருது’/’கலாம் கனவு மாணவர் விருது’கள் வழங்கப்படுகின்றன.
கவித்திங்கள் கார்த்திகை
’சொல்லில் தீவளர்த்துச் சுதந்திர யாகம் அல்லும் பகலும் ஆற்றிய வீரன், அன்னைத் தமிழின் அடிமுதல் முடிவரை இன்னும் பலப்புது இலக்கிய அணிகளைச் சார்த்தி மகிழ்ந்த சரித்திர நாயகன், பழைமைக்கும் புதுமைக்கும் பாலமாய் நின்றோன், குழையாத சிங்கம், கொள்கை மேலோன், சகாவெனக் கண்ணனைக் காளியைச் சார்ந்த மகாகவி யோகி, மரணத்தை வென்றோன்...' [நிலைமண்டில ஆசிரியப்பா]*
அந்த முண்டாசு கவியின் பிறந்த நாளைக் (திசம்பர் 11) கொண்டாடும் வகையில் மரபு, புதுக்கவிதை போட்டிகள் நடத்தப்பட்டு, வெற்றியாளர்களுக்குக் 'கவிச்செம்மல்' விருதுகள் வழங்கப்படும்.
தித்திக்கும் தை
‘வள்ளுவன் தன்னை உலகினுக்கே தந்து வான்புகழ் கொண்ட தமிழ்நாடு’
-என்று தமிழுக்கும் உலகிற்கும் பொய்யா மொழியாய்ப் பொதுமறையாய் விளங்கும் திருக்குறளின் பெருமையைப் பறைசாற்றும் வகையிலான கட்டுரை, கவிதை, பேச்சு, ஓவியப்போட்டிகள் ஆகியவை தைத்திங்களில் நடத்தப்படும். போட்டிகளில் வெல்பவர்களுக்குத் ‘வள்ளுவ மாமணி’ விருதுகள் வழங்கப்படும்.
மகளிர் மாசி
’மங்கையா ராகப் பிறப்பதற்கே – நல்ல மாதவஞ் செய்திட வேண்டும், அம்மா!’
-என்ற கவிமணியின் கூற்றுக்கேற்ப மாதவஞ் செய்த மாதர் சிகாமணிகளைப் போற்றும் வகையில் மாசித்திங்கள் நிகழ்வுகள் கொண்டாடப்படுகின்றன. ’மனைத்தக்க மாண்புடையாள்’ ஆகி இல்லத்தரசிகளாய்க் கோலோச்சி வீட்டையும் நாட்டையும் கட்டமைக்கும் பெண்களையும், ’பட்டங்கள் ஆள்வதும் சட்டங்கள் செய்வதும் பாரினில் பெண்கள் நடத்த வந்தோம்’ என்ற முண்டாசு கவியின் முழக்கத்திற்கு ஏற்ப பல்வேறு துறைகளில் கால்பதித்துச் சாதிக்கும் பெண்களையும் கண்டறிந்து அவர்களுக்கு ’மாண்புமிகு மகளிர்’ விருது கொடுத்து கௌரவிக்கிறது வாகை தமிழ்ச்சங்கம்.
வளர்ச்சி மற்றும் மேம்பாடு
‘தமிழ் எங்கள் மூச்சு என்று சங்கே முழங்கு! இன்பத்தமிழ் எங்கள் உயிர்க்கு நேர்!’ என்று தமிழால் இணைந்த குடும்பம் இது. பரந்து விரிந்த இந்த உலகத்தில் தமிழுக்குத் தொண்டு செய்ய விரும்புபவர்களைத், தமிழில் சாதனை செய்ய விரும்பவர்களின் தனித்திறன்களை வெளிகொணர்ந்து, அவர்களை எங்களுடன் கைகோர்க்கச் செய்வதே எங்களின் நோக்கம்.
இவ்வமைப்பின் மூலம் நடைபெறும் பணிகளின் விவரங்கள் :-
- வாகை தமிழ்ச்சங்கத்தின் மனித வள மேம்பாடு
- குழு ஒருங்கிணைப்பு மற்றும் மேலாண்மை
- வாகையின் அனைத்து புலனக்குழுக்களையும் நெறிப்படுத்துதல், தகவல்தொடர்பை நிர்வகித்தலும் மேம்படுத்தலும், புதுமையான செய்திகளையும் தகவல்களையும் வழங்குவதும் கண்காணித்தலும்
- வாராந்திர செய்தியறிக்கை
- ஒருங்கிணைந்த கண்காணிப்பு
- அரசு, அரசுசார் அமைப்புகள் பல்கலைக்கழகங்களின் ஒப்புதல் பெறுதல், அங்கீகாரம் மற்றும் இணைப்பு
- பயிற்சிப்பட்டறைகள் நிகழ்த்துதலும் ஒருங்கிணைத்தலும்
வாகை மழலையர் மன்றம்
"குழல்இனிது யாழ்இனிது என்பதம் மக்கள்
மழலைச்சொல் கேளா தவர்"
நோக்கம்
உலகின் மூத்த மொழியாம் தமிழின் பல்வேறு பரிமாணங்களை இன்றைய இளம் தலைமுறைக்கு அறிமுகப்படுத்தும் ஒரு ஏணியாய் மழலையர் மன்றம் செயல்பட்டு வருகிறது. வாகை மழலையர் மன்றச் செயல்பாடுகளில் மழலையர் வகுப்பு முதல் எட்டாம் வகுப்பு வரை பயிலும் மாணவர்கள் பங்கேற்கலாம். தமிழானது வாக்கிலும் மனத்திலும் இருந்திட வேண்டும் என்ற நோக்கத்தில் உருவாக்கப்பட்டது வாகை மழலையர் மன்றம். மழலையர் மன்றத்தின் செயல்பாடுகள் பின்வருமாறு:
தினம் தினம் திருக்குறள்
உலகப் பொதுமறையாய் விளங்கும் திருக்குறளை, மழலையர்கள் அறிந்திட வேண்டும் என்ற நோக்கில் நாளும் இரண்டு திருக்குறள்கள் என, நாள்தோறும் பதிவிட்டு வருகிறோம். இதன் மூலம் மழலையர்கள் வாசிப்பு மற்றும் வாழ்வின் அறநெறிகளைப் புரிந்துகொள்ளும் திறனை பெறுகின்றனர்.
கதை ஞாயிறு
வாரந்தோறும் ஞாயிற்றுக்கிழமைகளில் கதை ஞாயிறு நிகழ்வு நடத்தப்பட்டு வருகிறது. இதில் நீதிக் கதைகளும் வாழ்வியல் கதைகளும் மழலைகளிடம் பகிரப்பட்டுப், பின்னர் அவற்றின் மீதான வினாக்கள் தொடுக்கப்பட்டுக் குழந்தைகளிடம் கதைக்கேட்கும் ஆர்வத்தைத் தூண்டும் வகையில் நிகழ்வு நடத்தப்படுகிறது. இதன் மூலம் மழலையர்களின் கேட்டல் திறனும் சிந்தித்து ஆராயும் திறனும் வலுவடைகிறது.
மாதந்திர நிகழ்வு
மாதத்தில் இருக்கும் சிறப்பு நாள்கள் மற்றும் அறிஞர்களின் பிறந்தநாள்களைக் கொண்டாடும் பொருட்டு, ஒவ்வொரு மாதமும் மாதாந்திர நிகழ்வு நடத்தப்படுகிறது. இதில் மாதம் ஒரு தலைப்பு வழங்கப்படும். அத்தலைப்பில் கவிதைகள், கட்டுரை, பேச்சுப்போட்டி, கைவினைத்திறன் மற்றும் ஓவியப்போட்டி எனப் பலப் போட்டிகள் நடத்தப்படுகின்றன. இவற்றின் மூலம் மழலையர்களின் பேச்சுத்திறன், கற்பனைத்திறன், அவையஞ்சாமை, ஓவியத்திறன், கவிதை இயற்றும் திறன் ஆகியவை வளரும். மேலும் அவர்களை ஊக்கப்படுத்தும் விதமாக மாத இறுதியில் நிகழ்வுகளில் பங்கேற்ற அனைவருக்கும் மின் சான்றிதழ் வழங்கப்படுகிறது.
விடுகதை
மழலையர்கள் செயல்வழிக் கற்றல் திறன் மட்டுமின்றி அவர்களின் சிந்தனைத் திறனையும் ஊக்கப்படுத்தும் நோக்கத்தில் தினந்தோறும் மாலை விடுகதைகளும் வினாக்களும் கேட்கப்பட்டு அவர்களின் சிந்தனைத் திறன் ஊக்குவிக்கப்படுகிறது.
வாகை மகளிர் மன்றம்
"மங்கையராய் பிறப்பதற்கே நல்ல மாதவம் செய்திடல் வேண்டுமம்மா" என்று பெண்மையைப் போற்றிய கவிமணி தேசிக விநாயகம் பிள்ளை வழியில், பெண்களுக்கென தனியாக அவர்களின் தனித்திறனை வெளிக்கொணரும் பொருட்டும், தமிழ்த்திறனை மேம்படுத்தும் வகையிலும் உருவாக்கப்பட்டதே வாகை மகளிர் மன்றம்.
நாள்தோறும் காலை வேளையில் கோலம் போடும் ஆர்வத்தைத் தூண்டும் வகையில் ’வாகை கோலப்பகிர்வுகள்’ நடத்தப்படுகிறது, மேலும் ’நாளும் ஒரு புத்தகம் அறிவோம்’ எனும் பொருண்மையில் புத்தகங்களும் பகிரப்பட்டு மகளிரின் கற்றல் திறன்களையும் ஊக்குவித்து வருகிறது இம்மன்றம்.
வீட்டில் நடப்பது மட்டுமல்ல, நாட்டில் நடக்கும் அனைத்துவித நிகழ்வுகளையும், முக்கியச் செய்திகளையும் பெண்கள் தெரிந்திருத்தல் அவசியம். அதனை அனைவரிடமும் கொண்டுசேர்க்கும் வகையில் 'நாட்டுநடப்பு' எனும் செய்திப்பகிர்வின் மூலம் விழிப்புணர்வு செய்திகள், முக்கிய நிகழ்வுகள், பயனுள்ள தகவல்கள் ஆகியன பகிரப்படுகின்றன.
மேலும் மாலை வேளைகளில், மனத்திற்கு இதமளிக்கும் வகையில், ‘உங்களுக்கு தெரியுமா?’ எனும் பகிர்வில் அரசிடம் இருந்து பெறக்கூடிய பலப் பயனுள்ள தகவல்களும் அரசின் சேவைகளை எவ்வாறு பயன்படுத்துவது எனப் பலத் திறன்வளர் செயல்களையும் செய்து வருகிறது இம்மகளிர் மன்றம்.
வாகை பனுவல் மன்றம்
புத்தகம் வாசிக்கும் பழக்கத்தை ஏற்படுத்துதல், தமிழில் இருக்கும் எண்ணிலடங்காப் புதையல்களான இலக்கியங்களை எளிய முறையில் மக்களிடம் கொண்டு சேர்த்தல், இலக்கியங்களைக் கதை, நாடகங்கள் மூலமாக இளம் மாணவர்களிடம் இலக்கிய வாசிப்பை ஏற்படுத்துதல், இலக்கியங்கள், புத்தகங்கள் வாசிக்கும் பழக்கம் மூலமாக தன்னம்பிக்கையை அதிகப்படுத்துதல் ஆகியவற்றை நோக்கமாகக் கொண்டு உருவாக்கப்பட்டதே வாகை பனுவல் மன்றம்.
ஒவ்வொரு மாதமும் புத்தகங்கள் பகிரப்பட்டு, அவற்றின் மீதான எண்ண ஓட்டங்களைப் பங்கேற்பாளர்கள் அவர்களின் தரப்பில் வெளிக்கொணரும் வகையில் பனுவல் மன்ற கலந்துரையாடல் கூட்டங்கள் நடத்தப்பட்டுச் சான்றிதழ்களும் வழங்கப்படுகின்றன. தொடர்ந்து புத்தகமதிப்புரை வழங்கிவரும் தமிழ்ச்சான்றோர்களுக்கும் தமிழார்வலர்களுக்கும் ‘பனுவல் இரத்னா’ விருது வழங்கப்படுகிறது.
பின்வரும் அட்டவணைப்படி புத்தக மதிப்புரை நிகழ்வுகள் நிகழ்த்தப்படுகின்றன:
ஜனவரி
- டேனியல் செல்வராஜ்
- சொக்கன்
பிப்ரவரி
- சி.எம்.முத்து
- தி.ஜானகிராமன்
மார்ச்
- அழகிய பெருமான்
- இமையம்
- க.வெங்கடேசன்
- விக்கிரமன்
- ராஜேஷ்குமார்
- ஆதவன்
- லட்சுமி
ஏப்ரல்
- நம்மாழ்வார்
- இராகுல் சாங்கிருத்யாயன்
- எச்.பாலசுப்ரமணியம்
- கி.வா.ஜெகந்நாதன்
- எஸ்.ராமகிருஷ்ணன்
- வாண்டுமாமா
- ஜெயமோகன்
- பவாசெல்லதுரை
- ஜெயகாந்தன்
- புதுமைப்பித்தன்
- பிரபஞ்சன்
- கு.ப. ரா
மே
- சுஜாதா
- ராஜேந்திரன்
- ஜே.டிகுரூஸ்
- எம்.வி.வெங்கட்ராம்
- முகில்
- சுந்தர ராமசாமி
ஜூன்
- அரவிந்த் நீலகண்டன்
- வெ.இறையன்பு
- சல்மான்ருஷ்டி
- கண்ணதாசன்
- அகிலன்
- கழனியூரன்
ஜூலை
- தாமரை கண்ணன்
- பாலகுமரன்
- தமிழ் நாடன்
- ரமணி சந்திரன்
- இந்திரா கார்த்தசாரத
- கரிச்சான் குஞ்சு
- மதன்
- வைரமுத்து
- மெளலி
- சிற்பி பாலசுப்ரமணியம்
- மா.நன்னன்
ஆகஸ்ட்
- சோ.தர்மன்
- எம்.டி.வாசதேவன் நாயர்
- அ.வெண்ணிலா
- வண்ணதாசன்
- சுகி சிவம்
செப்டம்பர்
- ஜீ. நாகராஜன்
- மு. மேத்தா
- 8. தேவன்
- கி.ரா
- வெ.சாமிநாத சர்மா
- அசோகமித்திரன்
- அ.க.பெருமாள்
- ஈரோடு தமிழன்பன்
அக்டோபர்
- ஐராவதம் மகாதேவன்
- ஆண்டாள் பிரியதர்ஷினி
- ரா.கி.ரங்கராஜன்
- பா.ராகவன்
- சிவசங்கரி
- பெருமாள் முருகன்
- அமிஷ் திரிபாதி
- கு.ஞானசம்பந்தன்
- தொ.மு.சி.
- பாவண்ணன்
- பா.விஜய்
- ரமேஷ் பிரேதன்
- லா.ச.ராமாமிர்தம்
நவம்பர்
- கு.ப.சேது அம்மாள்
- அழ.வள்ளியப்பன்
- அப்துல் ரகுமான்
- தாமரை
- வல்லிகண்ணன்
- இந்திரா சௌந்தர்ராஜன்
- அருந்ததி ராய்
டிசம்பர்
- நா.வானமாமலை
- ஆயிஷா இரா.நடராஜன்
- வண்ணநிலவன்
- மயிலை சீனர் வேங்கடசாமி
- நா.பார்த்தசாரதி
- சாரு நிவேதிதா
- சல்மா
- தமிழ் மகன்
- நாஞ்சில் நாடன்